İstehlakçı paneli, istehlakçıların məhsullar və xidmətlər haqqında fikirlərini bildirdiyi, məhsul və xidmətlərin istifadəsi haqqında məlumatları bölüşdüyü platformadır. Ənənəvi istehlakçı panellərində məhdud sayda istehlakçı araşdırmaçıları qaydalı şəkildə olaraq məlumatlarla təmin edirdi. Lakin texnologiyanın inkişafı daha çox istehlakçını eyni məkanda toplamağa və seçmə üsulu ilə araşdırmalar etməyə imkan yaratmışdır.

İstehlakçılar öncə tələb olunan məlumatları təqdim etməklə paneldə hesab yaratmalıdır. İstehlakçı özü haqqında məlumatları düzgün təqdim etməklə şəxsi panelinə sorğuların göndərilməsi ehtimalını artırır. Çünki panel məlumatları müxtəlif  üsullarla yoxlamaqla onların yanlış olma ehtimalını yüksək qiymətləndirir və həmin istehlakçıya sorğu yönləndirmir. Həmçinin yönləndirilmiş sorğuları təlimatlara uyğun düzgün dəqiq və ətraflı cavablandırmayan istehlakçıların cavabları ləğv olunur və onlara ödəniş olunmur.

Balansdan məbləği çıxarmaq üçün “Balans əməliyyatları” bölməsində telefon nömrənizi yazmağınız və məbləği çıxart düyməsi ilə təsdiqləməyiniz kifayətdir. Tələbiniz Panel tərəfindən təsdiqləndikdən sonra məbləğ avtomatik olaraq Portmanat hesabınıza yüklənəcəkdir. Əgər Portmanat hesabınız yoxdursa, sistem sizi hesab açmağa yönləndirəcək.

Hər anketin ödənişi sualların sayından asılı olaraq dəyişir.

Bəzi araşdırmalarda anketin məbləği ilə yanaşı həm də lotereya oynanılır. Uduş sistem tərəfindən təsadüfi seçilmiş bir istehlakçıya verilir. Uduş mütləq hər hansı istehlakçı tərəfindən udulur. Uduşu qazanmış istehlakçının həm paneldəki hesabına, həm də telefon nömrəsinə bildiriş göndərilir. Lotoreyanı qazananlar şirkətə dəvət olunaraq uduşları onlara təqdim olunur.

İstehlakçılar balanslarındakı məbləği və ya onun bir hissəsini ehtiyacı olan insanlara ianə edə bilərlər. İanə olunmuş məbləğlər Paneldə ayrıca bir bölmədə yığılır və Bimpact şirkəti tərəfindən xeyir qrumlarına və digər ehtiyac sahiblərinə çatdırılır. İanələr və onların istifadəsi ilə bağlı ictimai hesabat təqdim olunur.

Hər bir istehlakçının ad və soyadı qeydiyyatda ona görə tələb olunur ki, Panel istehlakçıların robot-proqram yox, həqiqi insan olduğunu və hər istehlakçının sadəcə bir hesabı olduğunu təyin edə bilsin. Lakin istehlakçının ad, soyad, telefon nömrəsi və oxşar şəxsi məlumatları heç bir halda araşdırma edən tərəflərlə və ya başqa üçüncü tərəflərlə paylaşılmır. Cins, yaş, gəlir səviyyəsi və s. məlumatların alınması səbəbi isə istehlakçılara uyğun sorğuları yönəltməkdir. Hər bir məhsulun öz istifadəçisi olduğu kimi, hər bir araşdırmanın da öz hədəf kütləsi olur. Bu hədəf kütləni düzgün müəyyən edib, sorğuları uyğun respondentlərə göndərmək üçün Panelin bu məlumatlara ehtiyacı olur. Əks halda kişilərə qadın məhsulları ilə bağlı, qadınlara kişi məhsulları ilə bağlı, yaşlı insana gənclər tərəfindən istifadə olunan məhsullarla bağlı və s. yanlış sorğular gedərdi.

Araşdırmaların məqsədi bir istehlakçı haqqında nəticə çıxarmaq deyildir. Hətta araşdırmaların məqsədi sorğu aparılan qrup haqqında nəticəyə gəlmək də deyildir. Araşdırmaların məqsədi seçmədən, yəni sorğunun aparıldığı respondentlərdən yekunlaşdırılmış aqreqat nəticələr almaq və bundan istifadə edərək hədəf populyasiya haqqında ümumiləşdirmələr aparmaqdır. Məsələn, sizdən sorğu zamanı bir ay ərzində ərzaq alışına nə qədər pul xərclədiyiniz soruşulursa, burada məqsəd sizin nə qədər pul xərclədiyinizi öyrənmək deyil. Məqsəd siz və digər respondetlərin ortalama xərc göstəricisindən istifadə edərək statistik metodların köməyi ilə ümumi əhalinin aylıq ərzaq xərclərini hesablamaqdır. Məhz buna görə də Panel şirkətlərə araşdırma nəticələrini təqdim edərkən istehlakçıların kim olduqları barədə heç bir məlumat vermir. Yalnız istehlakçıların suallara verdiyi cavablar şərti təyin olunmuş kod vasitəsilə araşdırma edən tərəfə verilir. Şirkətlər respondentlərin kim olduqları, telefon nömrəsi və s. barədə heç bir məlumata sahib olmur. Panel bu siyasəti ilə həm gizliliyi və anonimliyi qorumaq, həm də hər hansı reklam cəhdlərinin qarşısını almaq məqsədi güdür.

Araşdırmaçıların asan ödəniş edə bilməsi üçün Paneldə kartla ödəniş funksiyası yerləşdirilmişdir. Hesaba ödəniş etmək istəyən şirkətlər paneldə yerləşdirilmiş e-mail vasitəsilə hesab məlumatlarını ala bilərlər. Şirkətlər araşdırma təcili olduğu halda müraciət edərək ödənişə qədər təsdiqlənmə tələb edə bilərlər.

Aparılmış təcrübələrə görə onlayn istehlakçı panellərində ənənəvi araşdırma alətlərinə nisbətdə dəfələrlə sürətli və xərc-effiktiv olmaqla yanaşı, həm də eyni dəqiqlikdə nəticələr ala bilirsiniz. Kvota seçməsinin tələblərinə cavab verməklə hədəf kütləni dəqiqliklə müəyyən etməyə və onlardan reprezentativ nəticələr almağa imkan verir.

Araşdırmanın qiyməti anketdəki sualların sayından və anketlərin ümumi sayından asılı olaraq dəyişir. Hesablama alqoritminə görə, anketdəki sualların sayı artdıqca hər suala düşən ödənişin həcmi azalır, lakin bir nöqtədən sonra sabitləşir. Anketlərin ümumi sayı artdıqca anket başına ödənişin həcmi sürətlə azalır. 1000 anketdən sonra anket başına ödəniş 50% - ə qədər edir. Bu güzəştlər Panel tərəfindən edilir və  istehlakçılara ödənilən məbləğə təsir etmir.

Onlayn istehlakçı panellərinin məlumatların dəqiqliyi ilə bağlı təbiət etibarı ilə digər araşdırma növlərinə görə müəyyən üstünlüyü vardır. Aparılmış elmi araşdırmalara görə insanlar yazarkən digər ünsiyyət vasitələrinə nisbətən daha düşünülmüş, dəqiq və faydalı məlumatlar verir. Digər tərəfdən hiylə edərək Paneldən ödəniş əldə etmək istəyənlərin qarşını almaq üçün Panel aşağıdakı alətlərdən istifadə edir:

• Hər bir istehlakçının telefon nömrəsi ilə təsdiq olunmuş unikal hesabı olur.
• Hər bir istehlakçı hesabını FİN kod vasitəsilə təsdiqləyir.
• Hər bir istehlakçıdan alınmış ilkin məlumatlara əsasən sorğular yalnız araşdırma hədəflərinə uyğun istehlakçılara göndərilir.
• İstehlakçıların müxtəlif sorğularda verdiyi məlumatlar qarşılaşdırılaraq təhlil olunur. Hiylə edən istehlakçılar Paneldən kənarlaşdırılır.
• Şirkət tərəfindən məlumatların keyfiyyətinin yoxlanması vasitəsilə öyrənmə alqoritmləri inkişaf etdirilir.
• Hər hansı sorğuda saxta məlumat olarsa həmin anket ləğv olunur və istehlakçıya ödəniş edilmir.
• Sistem tərəfindən məlumatların keyfiyyəti ilə bağlı müəyyən göstəricilər hesablanır.

Bildiyimiz kimi hər bir anketdə minimum 5 ədəd istehlakçı profili ilə bağlı demoqrafik suallar olur. Məsələn, cinslə, yaşla və s. bağlı. Araşdırma.az – da sorğu yaradarkən anketinizə belə sualları əlavə etməyə və buna görə ödəniş etməyə ehtiyac yoxdur. Bütün bu məlumatlar Araşdırma.az tərəfindən sizin araşdırmanın nəticələrinə avtomatik əlavə olunur.

Sistem anketin qiymətini sulların sayı artdıqca sualbaşına ödənişin miqdarını azaldan və seçmənin həcmi artdıqca anket başına ödənişin miqdarını azaldan alqoritmlə hesablayır. Anketdə olan sual sayı artdıqca sual başına düşən ödənişin həcmi azalır, 15 sualdan sonra isə sabitləşir. Anket sayına görə güzəşt aşağıdakı kimidir: 400 – 600 anket 20% endirim, 600 – 800 anket 30% endirim, 800-1000 anket 40% endirim, 1000-dən çox olan anketlər üçün isə 50% endirim. Endirimlər proqressiv qaydada hesablanır.

Çox cavablı sual növü, respondentə verilən sual qarşısında bir və birdən artıq cavab tələb edən suallardır. Məsələn: “{X} marka alış-veriş mərkəzini seçmə səbəbləriniz nələrdir?” Cavablar: “Yaşadığım yerə yaxın olması”, “İşıqlı və geniş olması”, “Ucuz olması”, “Bolçeşidli olması” və s. ola bilər. Cavablardan göründüyü kimi, bir markanı almaq üçün həm yaxın olma, həm də ucuz olması onu seçmə səbəbi ola bilər. Ona görə də bu sual çox cavablı olacaq. Lakin, sualı dəyişərək “Bu seçimlərdən hansı sizin üçün ən önəmlidir?” - desək, o zaman bu sual çox cavablı deyil, tək cavablı olacaq. Digər bir misal: “Hansı mobil oyun proqramlarından istifadə edirsiniz?” soruşduqda sual növü çox cavablı olacaqdır.

Bu sual növündə əvvələdən hazırlanmış variantlarla yanaşı, “Digər – respondentin öz seçimi” variantını da əlavə edə bilərsiniz. Bu zaman respondentin cavabı sizin təqdim etdiyiniz variantlar içində yoxdursa, o öz cavabını əlavə edə bilər. (Şəkilə bax)

Tək cavablı sual növü, yalnız bir cavabın alınması üçün istifadə edilən və ya təbiət etibarilə bir cavab tələb edən suallardır. Bu sual növünü istifadə edərkən, sualın qoyuluşunda birdən artıq cavabın tələb olmamasına diqqət etmək lazımdır.  Məsələn: “Zəhmət olmasa, cinsinizi qeyd edin”, “Aylıq gəliriniz aşağıdakı aralıqlardan hansına uyğun gəlir?”, “Ən çox istifadə etdiyiniz {X} məhsul markası hansıdır?”, “Lütfən, ailə vəziyyətinizi qeyd edin.” və s. tipli suallar təkcavablı suallar sayılır.
Likert şkalası vasitəsilə verilən suallar da təkcavablı suallardır: “Zəhmət olmasa, deyin. Qeyd olunan ifadələrlə nə dərəcədə razısınız?(Şəkilə bax)

Bu sual növündə əvvələdən hazırlanmış variantlarla yanaşı, “Digər – respondentin öz seçimi” variantını da əlavə edə bilərsiniz. Bu zaman respondentin cavabı sizin təqdim etdiyiniz variantlar içində yoxdursa, o öz cavabını əlavə edə bilər.

Mətn qutusu sual tipi, verilən sual qarşılığında heç bir variantın olmadığı, spontan cavabların alındığı sual növüdür. Bu sual növündə çoxsaylı və çox fərqli cavablar ala bilərik. Məsələn, “XYZ məhsulunun hansı markalarını tanıyırsınız?” “Hansı müəssisədə çalışırsınız?”, “Övladınız neçə aylıqdır?”, “{X} markasından nə üçün məmnun deyilsiniz?” və s.(Şəkilə bax)

Net Promoter Score (NPS) – Respondentlərin  istifadə etdiyi markanı digər şəxslərə  tövsiyə etmə səviyyəsini hesablayır. “Zəhmət olmasa, {X} brendini digərlərinə tövsiyə etmə ehtimalınızı 0-10 ballıq şkala ilə qiymətləndirin” sualı ilə soruşulur.(Şəkilə bax) Cavablardan 0-6 əleyhdarlar, 7-8 passivlər, 9-10 promoterlər sayılır. NPS hesablanan zaman umumi cavablarda promoterlərin faizindən əlehydarların faizi çıxılır.(Şəkilə bax) Ən yaxşı NPS balı 100, ən pis isə NPS balı isə -100-dür.

Araşdırma.az analiz zamanı NPS göstəricisini avtomatik hesablayır.

3D Matrisin (3 dəyişənli matris)  ənənəvi matris suallardan fərqi seçdiyiniz sütun və sətrlərlə yanaşı o seçimə müəyyən münasibət bildirirsiniz. Bütün sətir və sütun kəsişmələri üçün bir cavab seçilməlidir. Məsələn: Respondent sətirdəki bank markasına və sütündakı məhsul və xidmətlərə görə, onların kəsişmə yerində  məhsul və xidmətlərdən məmnuniyyəti qiymətləndirir. “Unibank” – “Pul köçürmələri” – “Məmnun deyiləm” olaraq cavab alınır. (Şəkilə bax)

Rənkinq sual növü respondentdən verilmiş variantları hər hansı bir xüsusiyyətinə görə sıralamağı tələb edir. Məsələn, A, B və C seçimlərini vacibliyinə görə düzdükdə, istehlakçı üçün A xususiyyəti B və C dən daha önəmlidirsə, o zaman A birinci, yerdə qalan variantlar arasında C variantı B - dən daha önəmlidirsə, o zaman C variantı 2-ci, B isə 3-cü yerdə yerləşir.
Məsələn: (X) qida məhsulunun seçimində aşağıdakı xususiyyətləri sizin üçün vacibliyinə görə sıralayın. (Digərlərindən daha vacib xususiyyəti ən üstdə yerləşdirərək, eyni məntiqlə davam edin).

Məhsulun qablaşdırılması

Tərkibinin sağlam olması

Qiyməti

Respondent də tutaq ki, variantları sürüşürərək 1-ci yerə “Tərkibinin sağlam olması”, 2-ci yerə “Qiyməti”, 3-cü yerə is “Məhsulun qablaşdırılması” variantını yerləşdirir.Qiymətləndirmə şkalalarının bütün variantlara eyni balı vermə problemini həll edir, lakin variantların sayı 6-8 – dən çox olduqda respondentin cavab verməsi çətinləşdiyi üçün rənkinq sualdan istifadə etmək tövsiyə olunmur.(Şəkilə bax)

Matris (Cədvəl)  sual növündə bir neçə dəyişən olur, bunlar sətrlər və sütunlar olaraq bölünür. Məsəslən: Sətrlər bölməsində məhsulun xüsusiyyətləri, sütunda isə müştərinin həmin xususiyyətə münasibəti ola bilər. Sual: “Zəhmət olmasa, ABC brendi haqqındakı aşağıdakı ifadələrlə nə dərəcədə razı olduğunuzu qeyd edin.”.
Respondentin birinci sətirə düşündüyü cavab, birinci sütünda olan “Heç razı deyiləm”dirsə, onların kəsişməsindəki xananı işarələyir.(Şəkilə bax) Mobil versiyada isə, hər bir ifadə üçün cavablar ayrılıqda göstərilir. (Şəkilə bax)

Sabit cəm şkalası vahid bir balın məhsul və ya xidmətin müəyyən xususiyyətləri arasında bölüşdürülməsi üçün istifadə edilir. Məsələn: Kərə yağı alarkən sizin üçün vacib olan xüsusiyyətləri göstərmək üçün verilmiş 100 balı aşağıdakı faktorlar arasında bölüşdürün. Variantlar: “Qiyməti”, “Tərkibinin sağlam olması”, “Paketləmə forması”, “İstehsalçı ölkə”. Respondent də müvafiq olaraq 40-30-15-15 kimi bölüşdürə bilər.(Şəkilə bax)

Sabit cəm şkalası Likert şkalasına nisbətən qiymətləndirilən variantlar arasında maksimum fərqlilyi təmin edir və Likert tipli qiymətləndirmə şkalalarının bütün variantlara bir-birinə yaxın bal verilmə problemini aradan qaldırır. Rənk suallar kimi, sabit cəm şkalası da variantların sayı çoxaldıqda (maksimum 6-8) effektivliyini itirir.

Likert şlakası və Likert tipli digər şkalalar tək cavablı və matris sual növlərində istifadə edilir. Verilən ifadəyə respondentin ifadə edilən münasibətini ölçür.  Cavablar “Heç razı deyiləm” , “Razı deyiləm” , “Nə razıyam, nə də yox”, “Razıyam”, “Tamamilə razıyam” formasında olur. Yuxarıdakı cavablar sözügedən şkalanın 5 variantlı və ya 5 ballıq versiyasını əks etdirir. Eyni zamanda, marketinq və elmi araşdırmalarda fərqliliyi artırmaq üçün 7 variantlı versiyadan da istifadə olunur.(Şəkilə bax)

A/B şəkil testində, şəkilləri sualın variantlarına yükləyərək respondentdən bu şəkillər arasında seçim etməsi istənilir. Bu şəkillər məhsulun yeni dizaynı, qablaşdırma forması, yeni logo, yeni reklam posterləri və s. üçün hazırlanmış müxtəlif variantlar ola bilər. Hazırlanmış bir neçə dizayn versiyasını hədəf kütlədən olan seçməyə təqdim edərək hansını daha çox bəyəndiklərini öyrənə bilərik. Araşdırma.az platformasında A/B şəkil testi sual növündə 2-5 ədəd şəkili bir sualda soruşa bilərsiniz. Respondent yalnız bir cavabı seçə bilər.(Şəkilə bax)

Ulduz/rəqəm reytinq sual növü, sualda verilmiş marka və ya məhsula, onların xüsusiyyətinə munasibətin ölçülməsi üçün istifadə edilir. Sual hissəsində, “Lütfən, {X} restoranınından nə dərəcədə məmnun olduğunuzu deyin.” şəklində sual yerləşdirə, cavab hissəsində isə 1-5, 1-7, 1-10 ballıq və ya digər ölçülü şkala ilə cavab tələb edə bilərsiniz. Cavablandırma iki formada – ulduzla və ya ədədlə ola bilər. Cavablamanın neçə baldan ibarət olmağını özünüz təyin edirsiniz. Araşdırma.az platformasında sualı yaradarkən rəqəmlə, yoxsa ulduzla olacağını və maksimum qiymətləndirmə balını seçməlisiniz.

Slayder sual növündə respondent cavablarda bir slayder görür və onu sağa doğru sürüşdürərərək istədiyi nöqtədə saxlaya bilir. Məsələn: “Neçə yaşınız var?” sualında, respondent 45 ədədində slayderi saxlayır. Slayderin başlanğıc və bitmə nöqtələrini sualı yaradan təyin edir.(Şəkilə bax)

Sorğularda tez-tez respondentlərə alınmış məhsul markaları, seçim amilləri, markalara münasibət və s. məsələlərə dair siyahılar təqdim olunmaqla seçim və ya qiymətləndirmə etmələri tələb olunur. Əksər hallarda isə markalarla bağlı siyahılar müxtəlif göstəricilərin ölçülməsi üçün istifadə olunduğu üçün sorğu boyu bir neçə dəfə təkrarlanır. Bu zaman respondentə siyahını hər dəfə eyni variantdan başlayaraq və eyni ardıcıllıqla təqdim etdikdə, ona elə gələ bilər ki, öndə verilən varinatlar daha vacibdir və ya o, öndəki variantı gördükdən sonra digərlərini diqqətli oxumaya bilər. Bundan başqa, balla qiymətləndirmə sullarında respondentlər siyahının sonlarına yaxın yorulur və sondakı variantları daha diqqətsiz cavablandıra bilər. Məhz bu kimi sistematik halların hər hansı markanın, seçim amilinin və s. nəticəsinə müsbət və ya mənfi təsir göstərməməsi üçün, başqa sözlə bu təsiri bütün variantların üzərinə yayaraq neytrallaşdırmaq üçün varinatların qarışdırılması – rotasiya alətindən istifadə olunur. Suala rotasiya tətbiq etmək üçün sualın redaktə rejimində “SUAL VARİANTLARI ROTASİYA EDİLSİN” düyməsini işarələmək lazımdır.

Keçid məntiqi sorğularda sadə fərdiləşdirmə, respondentlərin filtirlənməsi və diskalifikasiyası, eləcə də müəyyən şərtlər daxilində sorğunun vaxtından əvvəl sonlandırılması üçün istifadə olunur. Məsələn, siz 1-ci sualda respondetlərdən məhsulunuzdan nə dərəcədə məmnun olduğunu 5 ballıq şkala ilə qiymətləndirməsini istəyə, 2-ci sualda isə 1-ci suala 1-3 bal verənlərə nə üçün məmnun olmadığını, 3-cü sualda isə 1-ci suala 4-5 bal verənlərə nə üçün məmnun olduğunu soruşa bilərsiniz. Bu sadə misaldakı sorğuda 3 sual olacaq, lakin hər respondentdən yalnız 2 sual soruşulacaq. 1-3 bal verənlər 3-cü sualı, 4-5 bal verənlər isə ikinci sualı ümumiyyətlə görməyəcək. Bu həm hər bir respondent üçün sorğu suallarının az olmasını təmin etməklə respondentin yorğunluğunu azaldacaq, həm də məntiqsiz cavabların qarşısını alacaq (məntiqsiz sual məntiqsiz cavab doğurur). Nəticədə, keçid məntiqlərindən istifadə toplanmış datanın keyfiyyətinə müsbət təsir edir. Suala keçid məntiqi tətbiq etmək üçün, ƏMƏLİYYATLAR > KEÇİD MƏNTİQİ ƏLAVƏ ET əmrindən istifadə edin.

Şərti məntiq fərdiləşdirmə, cavablara uyğun fərqli suallar vermə və yaxud hər hansı sualın ancaq müəyyən şərtlər daxilində verilməsi üçün istifadə olunur. Bəzi tapşırıqları həm keçid məntiqi, həm də şərti məntiqlə etmək mümkündür, lakin şərti məntiq daha müərəkkəb şərtlər daxilində sualların fərdiləşdirilməsini təmin edir. Bundan başqa, suala şərti məntiq tətbiq olunarkən, bu digər suallara təsir etmir. Məsələn, Siz hər hansı xüsusi bir sualı ABC supermarketindən alış-veriş edən, avtomobili olan, evli və ya 30 yaşdan yuxarı qadınlara yönəltmək istəyirsinizsə, bu zaman həmin suala digər 4 sualın (alış-veriş edilən supermarket sualı, avtomobilinin olub-olmaması sualı, ailə vəziyyəti sualı, yaş sualı) cavablarına uyğun şərti məntiq tətbiq edə bilərsiniz. Suala şərti məntiq tətbiq etmək üçün, ƏMƏLİYYATLAR > ŞƏRTİ MƏNTİQ ƏLAVƏ ET əmrindən istifadə edin.

İnterpolasiya bir sualın cavabını digər sualın sual hissəsinə avtomatik yerləşdirməklə, sualı digər sualın cavabına görə dəyişməyə imkan verir. Məsələn, tutuq ki siz birinci sualda respondentin hansı çay markasından istifadə etdiyini soruşmusunuz. 20-ci sualda isə, məmnuniyyət qiymətləndirməsi aparmaq istəyirsiniz. Bu zaman 20-ci suala birinci sualın cavabını interpolasiya etməklə hər respondentin verdiyi cavaba görə həmin sualı avtomatik dəyişə bilərsiniz. Məslən, 1-ci respondent 1-ci sualda Beta seçibsə, 20-ci sual “Zəhmət olmasa, Beta çaydan nə dərəcədə məmnun olduğunuzu 0-10 ballıq şkala ilə qiymətləndirin.” şəklində, 2-ci respondent Final seçibsə, onun üçün eyni sual “Zəhmət olmasa, Final çaydan nə dərəcədə məmnun olduğunuzu 0-10 ballıq şkala ilə qiymətləndirin.” şəklində olacaq. Eyni tapşırığı hər marka üçün ayrıca sual yaradıb şərti məntiq tətbiq edərək də həll etmək olardı. Lakin İnterpolasiyadan istifadə etdikdə 10-15 fərqli sual yaratmağa ehtiyac qalmır. Sualı proqram özü dəyişir. İnterpolasiyadan istifadə etmək üçün, gərək cavabın götürüldüyü sual Təkcavablı olsun. İnterpolasiya əlavə etmək üçün: ƏMƏLİYYATLAR > SUALI REDAKTƏ ET > INTERPOLASIYA ƏLAVƏ ET > SUALI SEÇ. Verilmiş bölmələri keçdikdən sonra, şərti 20 ci sualda Final və ya Beta markasının 20 ci sualın sual başlığında çıxmasını istədiyiniz hissəyə "{keyword}" sözünü yazın. 20 ci sual belə olacaq.  “Zəhmət olmasa, {keyword} çayından nə dərəcədə məmnun olduğunuzu 0-10 ballıq şkala ilə qiymətləndirin.”  birinci sualda seçilmiş çay markası təyin etdiyiniz ({keyword}) bölməsinə yazılacaq.

Siz hansı sulların respondentlər tərəfindən mütləq cavablandırılmasını istəyirsinizsə, o zaman sualın redaktə rejimində “CAVAB TƏLƏB OLUNSUN” düyməsini aktiv vəziyyətdə saxlamalısınız. Əgər hər hansı sual könüllüdürsə, onda bu sual üçün həmin düyməni söndürə bilərsiniz. Bu düymənin ilkin vəziyyəti (default) aktiv olur.

Çoxseçimli suallarda əvvəldən hazırladığınız siyahı ilə yanaşı, respondentin öz variantını da əlavə etməsinə imkan yarada bilərsiniz. Bu suallar yarı-qapalı suallar adlanır. Ümumiyyətlə tövsiyə olunur ki, əksər hallarda bu funksiyanı aktiv edəsiniz. Çünki araşdırmaçının əvvəldən bütün variantları düşünməsi demək olar ki, mümkün deyil. Bu funksionallığı aktiv etmək üçün, sualın redaktə rejimində “RESPONDENT ÖZ VARİNATINI ƏLAVƏ EDƏ BİLSİN” düyməsini işarələyin.

Bəzi araşdırma növləri çoxlu sayda unikal suallardan (tapşırıqlardan) ibarət müxtəlif verisiyalı anketlərdən təşkil olunur. Bu zaman hər bir versiyanın müəyyən kvotası olur. Məsələn, tutaq ki, siz 20 versiya və hər versiyada 15 tapşırıqdan, ümumilikdə 300 tapşırıqdan ibarət konjoint araşdırması hazırlamısınız. Fərz edək ki, araşdırma dizaynına görə hər versiya üçün 30 respondent, ümumilikdə 600 respondent tələb olunur. Bu zaman siz dizayn faylını Excel formatında arasdirma.az – a yüklədikdən sonra vesiyaların idarə edilməsini proqram özü icra edir. Hər respondentə təsadüfi bir versiyalı anket göstərilir, hansı versiyaların kvotası (bu misalda 30 respondent) dolubsa, həmin versiyanı təsadüfi seçimə daxil etmir.